Vefatınıñ 25-nci yılında Müstecib Ülküsal’nı Añma ve Konferentsiya
“Emel Qırım Vaqfı“ tarafından teşkil etilgen “Vefatınıñ 25-nci yılında Müstecib Ülküsal’nı Añma ve Konferentsiya” programması 2021s. Qara qış ayı 10 Bazar künü saat 12.00’de internet ortamında kerçekleştirildi.
“Emel Qırım Vaqfı“ İdare Heyyetiniñ azası, Osman Gazi Üniversiteti Ögretim üyesi Doç. Dr.Erşahin Ayhun tarafından oqunğan Qur’an-ı Kerim ve yapılğan duadan soñ söz alğan “Emel Qırım Vaqfı“ Reisi ve Qırım Tatar Milliy Meclisi Türkiyedeki Temsilcisi Zafer Qaratay yaşanğan bütün dünya epidemiyası sebebinden qabri başında çoq sayılı añma teşkil etip olamağanlarını, ancaq 2021s. Qara qış ayı 8 Cuma künü Müstecib Ülküsal'nıñ qabrini, türbe baqıcısı “Emel Qırım Vaqfı“nıñ idare heyyetiniñ azası Cevdet Tahiroğlu ile ziyaret etip, dua yapqanlarını ayttı. Qaratay daha soñra Müstecib Ülküsal’nıñ Vatan Qırım yolunda mücadele ile keçken hayatınıñ hayran etici taraflarını, onı özgün bir insan yapqan vasıflarını ve özlerine yapqan tavsiyelerini añlattı.
Bundan soñra degerli büyügimiz Müstecib Ülküsal'nıñ hayatı üzerine dissertatsiya işi yapqan Romanya'dan Eden Qurtasan, Müstecib Ülküsal'nıñ mücadelesinden pek tesirlengenini ifade etip, özüni bu dissertatsiyanı hazırlamağa teşviq etken sebeplerni iştirakçilerle paylaştı.
Toplaşuvnıñ belki de eñ mühim iştirakçisi Bükreştte yaşağan, Azaplar'dan, Hacı Fazıl ailesini doğrudan tanığan, Müstecib Ülküsal'nı Dobruca'da soñ körgen insanlardan olğan, aynı zamanda aqrabası, oğlu Timur'nıñ mektep arqadaşı, Şefqati Abdurraim oldı. Abdurraim, Müstecip Ülküsal ile hatıraları aqqında söz yürseterek, Hacı Necip Fazıl'nı añlattı.
Bir soñraki maruzacı Konya'daki Genç Tatarlar'dan Fazıl Can “Biz proyektimizni başlarken, bu büyügimizniñ çıqarğan EMEL Dergilerini, O'nun hayatını rehber olaraq aldıq” dep, Ülküsal’nıñ öz hayatındaki emiyetini ifade etti. Bursa'dan Taha Bayraqtar da “Müstecib Ülküsal'nıñ Qırım Yolunda Bir Ömür kitabını oqudım, pek tesirlendim. Lütfen, siz de evinizge kelgen Emel'ni oqup, lütfen, bir kenarğa qoymañız, çünki Emel demek Müstecib Emce demek, bunı unutmayıq” dep, “Emel” dergisiniñ emiyetini ayırıca qayd etti.
Emel Qırım Vakfı İdare Heyyeti azası ve Müstecib Ülküsal’nıñ türbesiniñ baqıcısı Cevdet Tahiroğlu iştirakçilerni Ülküsal’nıñ Bulgaristan’daki faaliyetleri haqqında haber berdi. Programmada Qırım’dan iştirak etken araştırmacı yazıcı Zera Bekirova ise Müstecib Ülküsal’nıñ çalışmalarınıñ Qırım’daki milliy hareketke tesirlerini añlattı. Soñ maruzacı Fethi Qurtiy Şahin oldı. Şahin qonuşmasında Müstecib Ülküsal'nıñ yapqan eñ emiyetli işlerden biriniñ 1917’lerde, hatta Gaspralı ile başlağan ve Qırım'da yanğan meşalni Dobruca'ğa, Türkiye'ge bütün diasporağa aqtarması olğanını añlattı.
Qonuşmalardan soñra Romanya'dan Metin Ömer söz alaraq, pek faydalı bir programma olğanını seslendirdi. Namıq Kemal Bayar da herkeske Müstecib Emce kibi Vatan Qırım yolunda bir ömür nasip olmasını tiledi.
Soñ olaraq Emel Qırım Vakfınıñ Reisi Zafer Qaratay programmada iştirak etkenlerge teşekkür bildirip, kelecekte vaqıf olaraq suhbet toplaşuvlarına emiyet bereceklerini ayttı.
Programmanıñ tamamı Emel Qırım Vaqfınıñ YouTube kanalında körülebile.
