Eki Dünya Cenki Arasında
Romanya’daki Qırımtatar Milliy Hareketi
“Emel Qırım Vaqfı“’nıñ “Fikir-Kültür Konferentsiyaları” çerçivesinde 2021s. Qara qış ayı 10 Bazar künü saat 12.00’de teşkil etilgen, “Ölüminiñ 25 yılında Müstecib Ülküsal’nı Añma ve Konferentsiya” ile başlağan programmanıñ qonuşmacısı Romanya’dan Dr. Melek Fetislâm oldı.
Dr.Melek Fetislâm Bükreş Üniversiteti’nde Prof.Dr.Tahsin Cemil rehberliginde hususan Romanya arhivlerinde etraflı araştırma yaparaq “Eki Dünya Cenki Arasında Romanya’daki Qırımtatar Milliy Hareketi” adlı bir doktorlıq dissertatsiyası hazırladı.
Şimdi Romanya’nıñ Cluj-Napoca şeherindeki Babeş Bolyai Üniversiteti’niñ Türkologiya İnstitüti’nde hoca olaraq çalışmaqta olğan Fetislâm 2021s. Qara qış ayı 17 Bazar künü saat 13.00’te başlağan tedbirde de doktora dissertatsiyası ile bağlı bir taqdim yaptı.
Moderatorlığını Namık Kemal Bayar yapqan tedbir Emel Qırım Vaqfı Reisi Zafer Qaratay’nıñ qısqa bir qonuşması ile başladı. Dr.Melek Fetislâm taqdim yapqan soñ iştirakçilerniñ suallerine cevap berdi. İnternet vastası ile teşkil etilgen programmağa meraq büyük oldı.
Dr.Melek Fetislâm’nıñ “Eki Dünya Cenki Arasında Romanya’daki Qırımtatar Milliy Hareketi” adlı doktorlıq dissertatsiyası yaqın bir zamanda Romen tilinde Bükreş’te neşir etilecektir.
Emel Qırım Vaqfı’nıñ “Fikir-Kültür Konferentsiyaları” pandemiya künleri vaqtında her Bazar künü saat 13.00’te internet vastasınen periodik olaraq yapılacaqtır.
Bu toplaşuvnıñ video qaydını "Emel Qırım Vaqfı" youtube saifesinde körebilesiñiz.
