Ballıkpınar Köyü’nde “Qırımtatar Medeniyeti Evi”
Evelki dönem Qırım Dernegi Baş Reisi Tuncer Qalqay’nıñ koordinatorlığında hazırlanğan, yürsetilgen ve tamamlanğan “Medeniyet Evi” adeta küçük bir köy müzeyi duyğusını uyandıra.
Üç odadan ibaret olğan Medeniyet Evi’nde diqqat çekici pek çoq unsur buluna. Musafirlerni kirişte köyniñ qurulışı ve tarihçesine dair fotoğraflar ile açıqlamalar qarşılay.
Daha soñra içerisinde Qırım’nı hatırlatqan filcan, testimal, peşkir, cezve kibi pek çoq küçük obyekt yer alğan vitrinalar ile süslendirilgen bir odağa keçile. Musafirlerniñ duyğularını qayd etebilgenleri bir “Hatıra Defteri” de yer alğan odada Qırımtatar Halqı’nıñ millî lideri Mustafa Abdülcemil Qırımoğlu’nıñ müzeyge hediyesi olğan qalpaq da körülebilir.
Medeniyet Evi’niñ soñ bölümi de “Kelin Odası” olaraq hazırlanğan. Qırımtatarları’nıñ yaqın zamanğa qadar kelinlerniñ ciyezlerini, el emeklerini eñ zarif şekilde sergilegenleri bu anane müzeyde pek köz alıcı bir biçimde yer almaqta.
Qırımtatar qadınlarınıñ yüzlerce yıldır ketkenleri her yerge yanlarında taşığanları böyle güzel bir ananeniñ yañıdan hayat tapması adetlerniñ kelecek quşaqlarğa aqtarılması baqımından büyük ehemiyet taşımaqta.
Bu müzeyniñ bir diger ehemiyetli yanı da sergilengen eşyalarnıñ pek büyük bir qısmınıñ qadınlarnıñ sandıqlarından çıqqan qartanalar ve bitalardan qalğan maddiy olaraq baha biçilemeyecek qıymette şeyler olmasıdır. Aralarında 90-100 yıllıq nağışlar yer almaqta.
Tilegimiz böyle güzel çalışmalarnıñ Qırımtatarlarnıñ yaşamaqta olğan her yerde yapılabilmesidir. Böyle qıymetli degerlerimizniñ sandıqlarda turmak yerine kün ışığına çıqarılaraq sergilenmesi ve bu şekilde Qırımtatar medeniyetiniñ kelecek quşaklarğa el sanatları vastasınen de aqtarılması zarur.
