Ukraina Cumhurbaşqanı
"Ukrainanıñ Yerli Halqları Aqqında Qanunı"nı İmzaladı
Ukraina Cumhurbaşqanı Vladimir Zelenskiy kendisi teklif ettigi ve iyül 1 künü Yuqarı Rada tasdiqladığı "Ukrainanıñ yerli halqları aqqında qanun"nı imzaladı. Cumhurbaşqannıñ resmiy saifesinde bildirilgenine köre, mezkür qanun yerli halqlarnıñ medeniy, informatsion ve diger aqlarınıñ qorçalanmasını, Ukraina devletinen çalışuv mehanizmini teminleycek. Cümleden, yerli halqlarnıñ vekâletli organları tanılacaq. Qanunda Ukrainanıñ yerli halqları olaraq Qırım yaramadasında şekillengen qırımtatarlar, qaraylar ve qırımçaqlar tanıla. "Ukrainanıñ yerli halqı — Ukraina toprağında şekillengen, özgün til ve medeniyet saibi olğan, ananeviy, sotsial, medeniy ve vekâletli organları mevcut, özüni Ukrainanıñ yerli halqı, dep bilgen, onıñ ealisine nisbeten milliy azlıqnı teşkil etken ve Ukrainanıñ tışında öz devletçiligi olmağan milliy toplumdır", - denile qanunda. Bunıñnen bir sırada yerli halqlar Ukraina erkânında öz-özüni belgilev aqqına ve Ukraina Anayasası ve qanunları çerçivesinde siyasiy statusqa maliktirler. Olar insan aqları ve serbestliklerine saipler. Bunıñ kibi de yerli halqlarnıñ öz vekâletli organları vastasınen kendi kütleviy matbuat vastalarını meydanğa ketirmek ve devletten destek almağa aqları bar.
Elvira Ablâziz / Kiev
