Dr. Anna Sulimowicz-Keruth “Qaray Türkleri”ni Añlattı
“Emel Qırım Vaqfı“nıñ “Fikir-Kültür Konferentsiyaları” çerçivesinde 2021 s. Kiçik ay 7-sinde, Bazar künü, saat 17.00-de internet vastasınen teşkil etilgen toplaşuvnıñ adı “Qaray Türkleri” edi.
Konferentsiyanıñ qonuşmacısı Varşava Üniversiteti Şarqiyat Fakülteti, Türkologiya Bölüminden Dr. Anna Sulimowicz-Keruth edi.
İnternet vastasınen teşkil etilgen konferentsiyada iştirak etkenler arasında Dünya Qırımtatar Kongressi (DQTK) ve Qırımtatar Milliy Meclisi (QTMM) Reisi Refat Çubarovneñ Polonya’nıñ Ankaradaki Büyükelçisi Jakub Kumoch da bar edi. İştirakçileri çoq olğan toplaşuv tahminen 2.5 saat devam etti.
Moderatorlığını Varşava Üniversiteti Tarih Bölüminiñ Doktorantı, Araştırmacı Edige Buraq Atmaca yapqanı tedbir Emel Qırım Vaqfı Reisi Zafer Qarataynıñ qonuşması ile başladı. Qaratay qonuşmasında 2007 senesi Neşe Sarısoy Qarataynıñ rejisörlığında özü yapqan “Özü Türk Karaylar” vesiqalı filmni söylep Dr. Sulimowicz-Keruthnen bu vesiqalı film çekilgen vaqtında tanış olğanlarını añlattı. Soñra belgeselden bir bölüm kösterildi. Soñ Qaratay qonuşmasında Varşavada, Emel Qırım Vaqfı qurucılarından olğan ve Emel dergisi idareciligi de yapqan, 1999s. Kiçik ay 4-te bu dünyanı terk etken Murat Yaquboğlunı da añdı.
Qaraylarnen alâqalı akademik işler ve proyektlerden ğayrı Polonya Qaraim Dernegi, Qaray Türkleriniñ başqaca cemaat teşkilâtları ve Qaray toplulığı yayınlarınıñ basılmasında da vazife alğan Dr. Sulimowicz-Keruth qonuşmasına Qaraim ve Qaray ne demek olğanını añlataraq başladı.
Varşavada doğğan, 1988s.-den Varşava Üniversiteti Şarqiyat Fakülteti, Türkologiya Bölüminde akademik işini devam ettirgen Dr. Sulimowicz-Keruth, konferentsiyada Qaraylarnıñ tarihlerinen beraber eñ çoq sayıda yaşağanları şeherler ve bugünki vaziyetlerini, Qaray Türkçesiniñ qorçalanmasınıñ kerekligini ve Qaray nüfusınen bağlı tartışmalarnı añlattı.
Toplaşuvnıñ soñunda Dr. Anna Sulimowicz-Keruth iştirakçilerniñ suallerine cevap berdi.
Bu toplaşuvnıñ video qaydını "Emel Qırım Vaqfı" youtube saifesinde körebilesiñiz.
