Qırımtatarlar Ukrainanıñ Tamır Halqı!
Qırımtatarlar, qaraylar ve qırımçaqlar Ukrainanıñ yerli halqı olaraq tanıldı. Bu qanun içün Ukraina Yuqarı Radasınıñ 325 deputatı rey berdi.
Bu halqlar Qırım yarımadasında şekillendi. Bugünde-bugün Ukrainada 350 biñden ziyade qırımtatarı, 700 nefer qaray ve 200 qırımçaq yaşamaqta.
Yerli halqlar aqqında qabul etilgen qanunda bu halqlarnıñ vekâletli organlarına qoltutuv, medeniy, til ve diniy kimligini inkişaf ettirüvge imkân yaratuv közde tutula. Bundan soñra tamır halqlarnıñ vekilleri halqara alanda Ukraina delegatsiyası terkibine kirsetilecek.
Mezkür qanunnıñ qabul etilmesi işğal altındaki Qırım halqı içün Ukraina öz halqlarınıñ aqlarını qorçalağanı ve topraqlarınıñ qaytarılması içün er kün küreşni devam etkeni aqqında müim bir signal oldı.
Elvira Ablâziz / Kiev
