Nenkecan 10 Yaşında
Qırımtatarca olaraq latin elifbesinde yayınlanğan "Nenkecan" Qadın dergisiniñ 10-ncı yıldönümi 2021s. Çiçek ayı 24-ünde Aqmescitte "Yeşil ada" salonında "Birinciler izinden" serlevalı konferentsiya ve iftar ile qayd etildi.
Derginiñ ilk sanı 2011s. Saban ayı 3 tarihında (3 Mart 2011), İsmail Bey Gaspralı’nıñ qızı Şefiqa Gaspralı’nıñ çıqarğan "Alem-i Nisvan" dergisiniñ 105. yıldönüminde dünya yüzü körgen edi. Şu yerde Aqmescit Qadın Ocalar Mektebi talebeleriniñ 1922 senesinde “Nenkecan” adlı bir dergi yayınlağanlarını da qayd etmege isteymiz.
Derginiñ 10-ncı yıldönümi toplaşuvında Doçent Dr. Ranetta Gafarova - "Qırımda 1905-1922-lerde qadın hareketi tarihından", KMPU dekanı Doçent Dr. Alime Apselâmova "Qırımtatar sotsiokultürinde qadın meselesi", "Nenkecan" dergisiniñ muharriri Zera Bekirova "Qırımtatar qadınları 1950-den bugünge qadar milliy mucadele içinde" , İsmail Gaspralı müzeyiniñ mudiri Elmira Abibullayeva "İlk qırımtatar qadın dergileri", avukat Emine Avamileva "Qırımtatar ailelerinde qadınğa şiddet olabilirmi?", "Ceval" etnokompleksiniñ mudiri Dilâra Yaqubova "Qırımtatar qadınına biznesvumen olmaq qolaymı?" mevzularında sunum yaptılar.
Konferentsiya iftar yemeginen yekünlendi.
Saat 17.30-da başlağan tedbir “Сrimean Tatars” saifesinde canlı olaraq yayınlandı.
Biz de "Tuvğan Til" saytı olıp, tilini, kulturını, medeniyetini sevgen, qorup qorçalamaq ve kelecek nesillerge keçirmek istegen her kesni “Nenkecan”ğa ve böyle dergilerge qol tutmağa davet etemiz. Bu dergini tüşünip, amelge keçirgen, bu künlerge ketirgen ve yaşatmaq içün işlegen her keske yañı ösken nesiller adından teşekkür etemiz.
"Nenkecan" Qadın dergisiniñ 10 yıllığını daa bir kere hayırlap, çoq uzun yıllar yaşamasını tileymiz.
Çoq yaşa, bin yaşa “Nenkecan”…
