Nariye resim

 

 

 

 

Selime Çelebiyeva
(1921-1989)

 

 

Belli qırımtatar oyun ustası Selime Çelebiyeva 1921 senesi Arman ayı 21-de (Ağustos) Yalta civarında Simeyiz köyünde dünyağa keldi. Selime mektepni bitirgen soñ Yalta oyun ansambline qabul olundu. Soñra da Aqmescitteki qırımtatar oyun ve yır ansamblinde çalışdı. Qırımtatar halq oyunlarınıñ inceliklerini İzzet Dobra, Usein Baqqal kibi oyun ustalarımızdan ögrendi.

Selime Çelebiyeva 3

 

Selime Çelebiyeva 1944 senesi Quralay 18-de (Mayıs) bütün qırımtatar halqınen beraber Qırımdan sürgün etildi, qorantasınen beraber Uraldaki Sverdlovsk vilâyatine sürgünge tüşdi.

1948 senesi Özbekistannıñ Namangan şeherine köçti, 1951 senesi de yerli drama teatrinde oyuncı olaraq çalışmağa başladı.

1957 senesi Taşkentte “Qaytarma” qırımtatar yır ve oyun ansambli teşkil etilgen soñ, Selime Çelebiyeva da şu ansamblge davet etildi ve 1978 senesine qadar çalıştı. “Qaytarma” ansamblinde çalışqan yıllar devamında bütün qırımtatar halqınıñ sevgisini ve şuret qazandı. Öz oyunlarında elleriniñ nazik hareketleri ile keder, ümüt, quvanç, sevgi duyğularını ustalıqnen ifade etip, halq oyunlarımıznıñ ve muzıkamıznıñ ruhunı terenden añlap, hissetip, seyircilerge aqtara edi. Selime Çelebiyevanıñ icrasındaki “Ağır ava ve qaytarma”, “Tımtım”, “Qoqla oyını”, “Emir Celal”, “Sen de menim nazlı yarem” kibi qırımtatar halq oyunları “Qaytarma” ansambliniñ altın fonduna kirdi. Belli oyuncımız Yusuf Bolatnıñ “Arzı qız” pyesasında Ayşe rolüni de ustalıqnen icra etdi. “Qaytarma” ansamblinde çalışqanda, Selime Çelebiyeva öz marifetini yaş nesil oyuncılarına da ögretdi.


Selime Çelebiyeva 2

 

Qırımtatar oyunlarınıñ büyük ustası Selime Çelebiyeva 1989 senesi Arman ayında (Ağustos) vefat etti, öz vatanı Qırımda Mamut Sultan (Dobroye) köyüniñ mezarlığında defn etildi.

 

Qaynaqlar

http://gasprinskylibrary.ru/events/event/selime-chelebieva-1921-1989/

http://goloskrimanew.ru/selime-chelebieva-guriya-v-tantse-vdohnovenii.html

Murat Ğani. Sahna ustaları // Ğ. Murat. Teatr sanatımıznıñ saifelerinden. – Aqmescit, 1990. –  S. 52-66.

 

 

Pin It
  • Gösterim: 149