Bütün Türk Dünyasına
Navrez Bayramı Hayırlı Olsun !!!
Navrez – şarq halqlarında Yañı yıl bayramı. Navrez sözü eki sözden ibaret: nav – yañı, rez – kün. Navrez bayramı kün ve gece teñ olğan mart ayınıñ 21-inci kününe kele. Navrezde yañı yıl başlay ve bahar kele. Köylerde topraq işleri başlay. Qırımtatarlarda Navrez bayramını qadimiy devirlerde şereflep başlağanlar.
Bayram arfesinde qadınlar evlerini, azbarlarını cıyıştıra, yaraştıralar, çeşit qavaltılar, köbete, burmalar pişireler.
Bayram künü qartlar ve esli-başlı adamlar sabadan namazğa baralar, yañı yıl hayırlı ve bereketli olsun dep dualar oquylar. Soñra evlerde bayram sofraları donatıla.
Balalar toplaşıp ev evden yüreler, Navrez yırını yırlap, ev sahiplerini hayırlaylar. Olar balalarnı tatlı yemeklernen sıylaylar.
NAVREZ (yır)
Keldi bahar nur saçıp,
Navrez qoquy mor açıp,
Yeşerdi çöller, dağlar,
Ezan navrezim mübarek.
Navrez keldi körüñiz,
Navrez aqqın beriñiz,
Cennet olsun yeriñiz,
Ezan navrezim mübarek.
Keldi bahar turuñız,
Bu navrezge baqıñız,
Köterilsin başıñız,
Ezan navrezim mübarek.
Evnin artı bağça,
Aqtar-tontar boğça,
Balalarğa beş (yımırta) aqça,
Ezan navrezim mübarek.
Çıqtı çölge batır Alim,
Zilfi qara düldüli,
Ol Tanrınıñ arslanı,
Ezan navrezim mübarek.
