“Ana Tili Künü”ni Hayırlaymız!

 

Sayğılı vatandaşlarımız… 800 yıllıq yazılı menbaları olğan tilimizni coymaqtamız. Hepimiz yahşı bilemiz ki, halqımız 1783-ten bu küngece özüni qorçalamağa tırışa. Bizlerni 1944-nci sene bütünley yoq etmege istediler, halqımızğa açıqtan aytılmağan bir genotsid yaptılar. Amma çoq şükürler olsun, yoq olmadıq. Vatanğa qaytuv içün büyük bir küreş alıp bardıq. Bu vaqıtta insan haq-huquqları ve universal degerliklerden asla da qaytmadıq. Bu sebepten dünyada büyük bir itibar qazandıq. Lâkin sürgünlik vaqtında tilimizni, medeniyetimizni saqlamaq çoq qolay olmadı. Halqımız inanılmaz ğayret kösterdi. “Lenin Bayrağı”, “Yıldız” jurnali, Ğafur Gulam adına neşriyatta çıqqan kitaplar bu sebepten pek qıymetlidir. Olar pek müim bir vazife becerdiler.

Vatanğa qaytuvdan soñ medeniyetimizniñ yañıdan tiklenüvi için kösterilgen ğayret de diqqatqa lâyıqtır. Amma bütün bu vaqıt içinde diasporanen-Qırım arasında bağ üzülgeni de bir kerçektir. Çeşit sebeplerden Qırımdan çıqmağa mecbur olğan qırımtatarları da til ve medeniyetlerini saqlamağa oğraştılar, lâkin til meselesi kimse içün qolay olmadı.

Diasporada da medeniyet ve tilniñ qorçalanuvı büyük bir problemadır. Diasporada qurulğan teşkilâtlar öz ğayretlerinen bu mevzuda oğraşsalar da, afsus ki, tilimiz UNESCO’nıñ coyulmaqta olğan tiller cedveline kirsetilgendir.

İşte bu sebepden biz, diasporada bütünley qırımtatarca iş körecek “Tuvğan Til” saytını qurmağa qarar berdik. Maqsadımız tilimizni qorçalamaq, Vatan Qırımnen diaspora arasında bağ qurmaq, edebiyatımız, medeniyet ve sanatımıznıñ qorçalanıvu, tanıtılıvu, ögretilüvi ve inkişafı hususında faaliyet köstermek olacaqtır. Bu yolda dünyanıñ ne yerinde olsa olsun, gazetacılar, sanatçılar ve bu işke qoşulmağa istegen her kesnen çalışmağa isteymiz.

“Ana Tili Künü” qayd etilgen vaqıtta tilimizniñ saqlanuvı ve inkişafı mevzusında işleğen her kesten Allah razı olsun.

“Ana Tili Künü” hayırlı olsun.

                                                                                                                                                                              Oya Deniz ÇONĞAR

 

 

 

 

Pin It
  • Gösterim: 176