*Eniñ-boyuñ döp-dörtkul, tap qol sandıq,
 “Urgiil” dep aytmağa biz utandıq.

 Halq ne dese ne desin, men boldım doyın,
 Qaqtım aldım cigitniñ pervoy soyın!

*Qalğansıñ qasır astında toz basılıp,
 Öler edim sen bolsam cipke asılıp.

 Qaşıqaşıñ aşamam, eti qaqsıq,
 Mıyığı sarı, közü kök, kimge tansıq.

*Qaşıqaşıñ aşamam may qatmasañ,
 Qaraltıñnı cağarman söz qatmasañ.

 Qarçığaday boyuñ bar, halq qaraşa,
 Beyaz betke qara qaş şay yaraşa!

*Seniñ qaşıñ qarası menim bahtım,
 Bir körgende can süydi, iridim, aqtım.

 Aqıl sende aqqan suv, fikir – derya,
 Şay bola da keteken yalan dünya.

*Köyüñizniñ colunda künaylan açqan,
 Aqız, saña ne boldı, çırayıñ qaçqan?

 El üstü tiydi – avurdım, üç-beş kün çattım,
 Ekşi-turşı aşadım, köterdim attım.

*Men bu yerge keldim köyümden tayıp,
 Qaysıñızğa qonayım qanatım cayıp?

 Musafir kelse, hoş keldi, odağa tüşsün,
 Musafir sıyı qavedir, toqta pişsin.

*Ocaq başı töşevli, törü taqır,
 İrimçik aşı pişirip üyüñe çaqır.

 Musafir kelse, hoş keldi, sıy qavesi,
 Siz de bizday ekensiz, zevq avesi.

*Bismillâdan başladım, elâmdan quvdım,
 Aygidi, yalan dünyanı soñunda tuvdım.

 Ah demesem qaytiyim, candım da küydim,
 Qademsizniñ balasın qaydan da süydim.

*Allegim ekeç oñmaycaq, men mensirey,
 Kökmen yerniñ arasın başıman tirey.

 Allegim ekeç oñmaycaq, menden beter,
 Cırtıp alıp etegin cuvğıç eter.

*Şehrizade masalı biñ bir dane,
 Ayağım arşın basarman, kimler mani?

 Şişip qalsın çal maliy, alıp qaçtı,
 Qırq taleke çıñımnı colğa çaçtı.