UKRAİNALI GÖÑÜLLİLERDEN - QIRIMTATAR BAYRAĞI
Ukrainanıñ Donetsk vilâyetindeki Kramatorsk şeeriniñ göñüllileri qocaman qırımtatar bayrağını tiktiler. Milliy bayraq bayramı künü bayraq Qırım taba uçacaq.
Usta terzi Oksana Muravlövanıñ tarif etkenine köre, o, eki hafta devamında bayraqnıñ qısımlarını biri-birine eklevnen meşğuldir. Bu sefer bayraqtaki tamğa adeti üzre köşede degil de ortasında olacaq. "Bunı mahsus yaptıq ki, tamğa kökten körünsin. Mavı basma köknen bir tüste olğanda, köşedeki ufaq tamğa körünmey. Tamğa büyükçe olsa sanki küneşimiz kökte avelengen kibi olur", - dep qayd etti ukrain qadını.
Bu areketleri ile ukrainler Qırımğa göñüldeşligini ifade etmek niyetindeler. "Biz Ukraina ve Qırım bir bütün olğanını köstermek isteymiz. Ukraina — bir, er bir ukrain Qırımda mıtlaqa olğandır ve olmaqnı arzu ete. Biz qırımlılarnen birlikte zaferimizni bekleymiz", - dedi usta. Qırımtatar halqınıñ tamğasını tikmek içün Oksana 60 metr uzunlıqta tikiş yaptı. Bu işte ise oña daa beş göñülli yardım etti. Tamğa 5 saat devamında tikildi .
Bayraknı Ukraina rekordlar kitabında qayd ettirip, sabıq siyasiy mahbüs İsmail Ramazanovğa berilecek. Bayraqnı işğal altındaki Qırım üzre uçurmaq ğayesi oña aittir. Bayraq iyün 26 künü — Milliy bayraq bayramında Qırımğa taba yol alacaq.
Milliy bayraq bayramı künü Qırım üzre uçacaq qocaman qırımtatar bayrağı azır. Bayraq üzerinde birinci olıp öz istegini qırımtatar halqınıñ lideri Mustafa Cemilev yazdı - "Bekleñiz. Kelecekmiz".
Qırımlı semetdeşlerge hitap yazıları devam ete. Bunıñ kibi de, öz isteklerini Meclis reisi Refat Çubarov ve onıñ muavini İlmi Ümerov yazdılar. İlmi Ümerov - "Qırım bizim. Er vaqıt qaytacaqmız", - dep qararını bildirdi.
İsteklerini yazmağa istegenler içün daa vaqıt bar. Bayraq Ukraina bölgeleri boylap seferge çıqa ve soñ noqtası Qırımğa keçüv sıñır punktında olacaq.
Elvira Ablâziz / Kiev
