Ukraina Yuqarı Radasınıñ Qarşısında
Qırımtatar Bayrağı Yelpiredi
Ukraina Yuqarı Radasınıñ qarşısında meydanda qocaman qırımtatar bayrağı yayıldı. Er bir istegen insan kelip, işğal altında yaşağan soydaşlarına tileklerini yazabildi.
Şunı qayd etmeli ki, milliy bayraq üzerinde birinci tilekni qırımtatar halqınıñ yetekçisi Mustafa Cemilev yazdı.
Qırımğa qoltutuv aktsiyasınıñ teşkilâtçılarından biri sabıq siyasiy mahbüs İsmail Ramazanovdır. "Bayrağımız Donetsk vilâyetiniñ Kramatorsk şeerinden Kiyevge kelgeni ve biz Yuqarı Rada qarşısında aktsiyağa toplanğanımız simvolik bir adisedir.
Bundan soñra bayraq Lvovğa, andan da Odessağa ve daa bir qaç şeerge yol alacaq.
Er yerde qırımlılar içün tilek sözleri yazılacaq.", - dedi Ramazanov.
Milliy bayraq bayramı künü ise bayraqnı Qırım sıñırından yarımada taba uçurmaq planlaştırıla. Aktsiya Qırımtatar halqı Qurultayı ğayrıdan faaliyetini başlağanınıñ 30 yıllığına bağışlana.
Elvira Ablâziz / Kiev
