Qırımtatar Küreşçisi Olimpiadada 5-nci Oldı
Ukrainalı qırımtatar küreşçi Lenur Temirov Tokioda keçken Olimpiya oyunları 2020-de 5-nci yerni qazandı. Qırım ve Kremençugnı temsil etken semetdeşimiz tunç içün yunan-rum küreşinde yutquzdı. Çin temsilcisi Saylike Valihanğa köre daa ziyade azırlıqlı ve iradeli olğan Lenurnıñ bu sefer çastı yürüşmedi.
Ukrain küreşçisi tutuşuvnıñ birinci qısmında ball qazandı, amma çinli küreşçi esapnı teñleştirdi. Tutuşuvnıñ soñuna qadar ücümde bulunğan Temirov artıq ball qazanalmadı. Esap teñ olğanına baqmadan, oyun qaidelerine köre ğalebe soñ ball qazanğanğa berile. "Küreşnen oğraşqanıma iç bir zaman peşman olmadım", - dedi qırımtatar sportçısı.
Finalnıñ 1/8-nde o, RİO-2016-nıñ tunç saibi özbek Elmurat Tasmuradovnı 5:0 esapnen yeñdi. Finalnıñ çeriginde ise ermeni Armen Melikândan küçlüce olğanını kösterdi. Yarıfinalda ise yaponiyalı Kenitiro Fumitanevge yutquzdı.
Şunı qayd etmeli ki, Sudaqnıñ Qoz köyü sakini Lenur Temirov öz sport karyerasını 6 yaşında başladı. Yunan-rum küreşi boyunca halqara sınıf sport ustasıdır. Onıñ idmancısı İsmet Saliyevdir.
Elvira Ablâziz / Kiev
