Kievde Halqara Ana Tili Künü Qayd Etildi

Kievde  "Qırım ailesi"nde Halqara "Ana Tili Künü" büyük bayram kibi qayd etildi. Balalar ana tili, Vatanğa bağışlanğan şiirlerni oqudılar. Tedbirlerge Lvov, Herson ve Qırımdan balalar da qoşulıp, balalar içün  teşkil etilgen "Til — halqnıñ qalbidir" eserler yarışında iştirak ettiler. 

thumbnail 2

18  nefer iştirakçi til aqqında fikir ve tüşüncelerini ifade etti.  "Qırım ailesi"  yolbaşçısınıñ aytqanına köre, koronavirus sebebinden   ana tili künü tedbirlerini istenilgen kibi keniş şekilde keçirmekniñ imkânı olmadı.  Anife Qurtseitova "Balalar  içün açıq ders keçirdik. Vatanımızdan uzaqta yaşasaq da  ana tilimizni unutmaymız, oyun, yırlar vastasınen ana tili sevgisini aşlaymız. Bunıñ içün merkezimizde şarait yaratmağap tırışamız", - ayttı. Halqara "Ana Tili Künü"nde Ukraina Cumhurbaşqanınıñ Qırımdaki vekâletliginde qırımlılarnıñ aqları bozulğanı aqqında aytıldı. Cümleden, Anton Körineviç işğalcilerniñ yarımadada ukrain ve qırımtatar tilini qullanmaqnı yasaqlağanlarını bildirdi. 

thumbnail

Ukraina Cumhurbaşqanınıñ Qırımdaki vekâletliginde "İşğalciler Qırımda ukrain tilini qullanmaqnı yasaqlap, ukrain mediası, mektep ve müessiselerini yoq etmekteler. Qırımtatar tili de aynı böyle vaziyette bulunmaqta.  Bu hususta elimizde olğan arizalardan bilemiz ki, cumhuriyetniñ devlet tilleri olğan ukrain ve qırımtatar tilleri içün sanki inkişaf imkânları yaratılmay", - dep qayd ettiler.

                                                                                                                                                                                  Elvira Ablâziz / Kiev

 

Pin It
  • Gösterim: 320