2021 Litvaniya Tatarları Tarih ve Medeniyet Yılı:
Hayırlav ve Kontsert Programması
Kültür ve Turizm Bakanlığı, Yurtdışı Türkler ve Akraba Topluluklar Başkanlığı, Litvaniya Ankara Büyükelçiligi, Ukraina Ankara Büyükelçiligi ve Umumiy Merkezimiz işbirliginde 2021s. İlk qış ayı 16 Cumaaqşamı künü aqşamı “2021 Litvaniya Tatarları Tarih ve Medeniyet Yılı: Hayırlav ve Kontsert Programması” teşkil etildi.
Ankara Resim ve Heykel Müzeyi tarihiy Türk Ocağı Salonında keçirilgen kontsert ve hayırlav programmasında Litvaniya Ankara Büyükelçisi Ričardas Degutis, Ukraina Ankara Büyükelçiligi Elçi Müsteşarı Natalya Lopatina, Yurtdışı Türkler ve Akraba Topluluklar Başqan Yardımcısı Abdülhadi Turus ve Baş Reisimiz Mükremin Şahin iştirak etti. Üst seviyede iştirak ile kerçekleştirilgen programmada ÖSYM (Ölçme, Seçme ve Yerleştirme Merkezi) Başqanı Prof. Dr. Halis Aygün ile birlikte Türkiyeden ve Ukrainadan körümli cemaat teşkilâtlarınıñ temsilcileri de iştirak ettiler.
Gece başında programmanı alıp barğan Tuvğan Til İnternet Saytınıñ Koordinatorı Oya Deniz Çongar Şahin slaytlar vastasınen Litvaniya/Lipka Tatarları haqqında malümat bergen bir taqdim yaptı.
Kontsert programmasınıñ açılışında ilk olaraq sözge çıqqan Baş Reisimiz Mükremin Şahin böyle sözler ayttı: “Bizler aslında aynı yañıdan kelgen insanlarmız. Bir yerge kelgenimiz zaman aynı tilde laf etmesek bile añlaşmamız hiç zor olmay. Sayğılı Büyükelçilerniñ şahsında Litvaniya ve Ukraina devletine teşekkür etemiz. 2021 yılını Lipka Tatarları yılı olaraq qabul ettiler… Türkiyede yaşağan Qırımtatarları Lipka Tatarlarınıñ qardaşıdır. Dost Litvaniyağa Qırımtatar Milliy Hareketine bergen destegi içün teşekkür etemiz”.
Babasınıñ vefatı sebebinden programmağa qoşulamağan Ukraina Ankara Büyükelçisi Vasıl Bodnarnı temsil etken programmağa Ukraina Büyükelçiligi Elçi Müsteşarı Natalya Lopatina qoşuldı. Lopatina yapqan qonuşmada Türkiyeniñ serbest Ukrainanı tanığan 1991s. İlk qış ayı tarihiniñ 30-ıncı yıldönümi olğanını hatırlataraq, Türkiye-Ukraina münasebetleri haqqında da söz yürsetti. Lopatina, Qırımnıñ işğalden qurtarılmasına yönetilgen Litvaniya devletiniñ bergen destegini hatırlattı ve dost Litvaniyağa teşekkür etti.
Litvaniya Ankara Büyükelçisi Ričardas Degutis ise qonuşmasında Qırım Tatarlarnıñ Litvaniya, Türkiye ve Ukraina arasında oluştırğan tarihiy köpürge diqqat çekti. Büyükelçi Degutis, programma çerçivesinde açılğan fotografiyalar sergisi sayesinde yurt içi ve yurt tışından davetlilerniñ, Qırımtatarları haqqında bilgi sahibi olabileceklerini qayd etkenden soñ “Litvaniyanıñ mustaqilligini qazanmasına issesi olğan büyük Qırımtatar toplulığına teşekkür etemiz”, - dedi.
Gecede soñ olaraq sözge çıqqan Yurtdışı Türkler ve Akraba Topluluklar Başqan Yardımcısı Abdülhadi Turus, Litvaniya Tatarları yılını tebrik eterek, bu adımnıñ Litvaniya ve Tatar toplumı içün hayırlarğa vesile olmasını tiledi. Turus, sözlerini “Qırımtatarları ile aramızdaki tamır bağlar bellidir. Qırımtatarları içün mesüliyetli olğanımıznı bilemiz. Eñ başında Qırımtatarları olmaq üzere bütün soydaş toplulıqlarımızğa destek olmağa devam etecekmiz”, - dep tamamladı.
Qonuşmalardan soñ kontsert programmasına keçildi. "Cıyın" Ansambli ile Kiyevden kelgen "Qırım Ailesi" oyun ve yır taqımınıñ Qırımtatar halq oyunlarından örnekler taqdim etilgen kontsert programmasında Elzara Batalova da yırları ile iştirak etti.
Kontsert esnasında "Qırım Ailesi"niñ Koordinatorı Anife Kurtseyitova bir qonuşma yaparaq, hem teşkilatları haqqında bilgi berdi, hem de olarğa eñ başından berli destek bergen Türkiyege teşekkür etti. Kurtseyitova daha soñra YTB Başqan Yardımcısı Abdülhadi Turusqa destekleri içün bir teşekkür yarlığı taqdim etti. Turus da her eki oyun taqımındaki balalarğa hediyeler berdi.
Kontsert programması çekilgen umumiy fotografiya ile yekünlendi.
Fotoğraflar: Ernur Onrat, qha
