AŞHANEMİZDEN
Oya Deniz ÇONĞAR 
Kiriş Sözü
Sayğılı dostlarımız...
Saytımıznıñ bu köşesinde milliy aşlarımız hususında söz yürsetmege isteymiz. Em aşlarımıznı bilmegen adamlarğa tanıtmaq, em belli bir saytta olarnı qayd altına almaq, em de yañı ömür qurmağa başlağanlarğa yol köstermek niyetindemiz.
Halqnıñ yaşağan yeri, iklimi, tarihiy keçmişi ile bağlı olaraq milliy aşlarımız elbette pek çoq deñişmeler keçirdi. Yemeklerimizniñ çeşitliliginiñ özüne ait tarihi bardır. Dağlıq bölgelerde, çöl tarafta ve yalı boyunda yemek zenginligimiz çeşitlilik köstermektedir. Sarı yağ (sarımay), quyruq yağı (quyruqmay), toñ yağı (toñmay: içyağı iritilip, süzülip, saqlanuv şekili), ösümlik yağları çoqça qullanılır ve aşhanemizniñ temelidir. Yemeklerimizniñ çoqusı hamır ve etli aşlardır. Lâkin sebze ve yemiş ziyadece qullanılğanı kibi aşlarğa bal da qoyulır. Hususan Bağçasaray mutfağı İstanbul mutfağı qadar zengindir. Evliya Çelebi öz ‘’Seyahatnamesi’’nde Bağçasaray mutfağını cennetke oşatır.
Dostlarımız, Qırım yarımadası geografik taraftan bir çoq qadimiy memleketlernen sıñırdaş olğan edi. Bu sebepten bir çoq medeniyetlerniñ adetleri, ananeleri halqımıznıñ folklorına ve, elbette, yemek pişirüvine tesir etkendir; amma hamırlı, etli, yemişli yemeklerimiz bizni başqalardan ayırmaqtadır. Mutfağımız hamır aş degende dünyada belli bir yerge sahiptir. Ancaq halqımıznıñ yaqın tarihi felâketlernen toludır. Kene de hicretler, köçler, sürgünlikler sebebinen ve Sovyet vaqtında yaşanğan büyük ğayıplar yüzünden coyulmağa başlağan medeniyetimizden milliy yemeklerimiz saqlanıp; bugün de bugün dünyanıñ eñ zengin mutfaqlarından biri olıp qalğandır. Ğayrıdan tarih boyunca tanış olğanımız başqa halqlarnıñ aşları da bizge ilham berip, yañı yañı aşlar ortağa çıqıp, endi öz aşımız olğanlarını da bilemiz.
Pek çoq pişirilgen yemeklerimiz ne qadar deñişse de, alâ daa pişirilip aşala, amma, afsus ki, bazı aşlarımıznıñ tek adları qalğan. Ne tarifleri bar, ne de lezzetleri biline. Faqat kene de pek bahtlımız, çünki yaşağan, özüni keliştirgen, ‘’men de barım’’ degen bir mutfaqqa sahipmiz. İşte bu sebepten internet vastasınen bu saytta özümiz bilgen yemeklerimizni sizlerge tanış eter ekenmiz sizler bilgen aşlarnıñ tariflerini de bekleymiz. Aş tatlı olsun…
TATARLARNIÑ YEMEKLERİ
Bizim aşlarğa belli,dünyada yetken yoq.
Olar em de lezzetli, em de pek yaman çoq.
Qavurmalar, maqarneler, sarma, dolmalar, Aman!
Bastırmalar, köbeteler, çeşit şorbalar.
Qırımtatar yemeklerini sayıp başlasañ bitmez.
Olarnıñ lezzetini maqtamağa söz yetmez.
Tataraş, burma, kebap, baqlalı laqşa.
Bu aşlardan sen aşap, biñ yıllar yaşa.
Bir qaveden başlasañ, tatlı şekerden,
Soñ toyğance aşasañ o yemeklerden.
Loqumlardan, elvalardan, canım nazlanır, Aman!
Şerbetlerden, tatlılardan başım aylanır.
Qırımtatar yemeklerini sayıp başlasañ, bitmez.
Olarnıñ lezzetini maqtamağa söz yetmez.
Edip Asanov
