Yarışmanı Qazanğanlar ve Mükâfatlar Belgilendi

Cengiz Dağcı, Qırımtatarları içün bar olmaqnıñ ve ümütniñ temsili olğandır.

Yaşağanı zor zamanlarğa rağmen toprağından biñlerce kilometr uzaqta halqı içün yañıdan yeşergen qocaman bir çınar olğandır o… 

Qırım içün doğğan, Qırım içün yaşağan ve Qırım içün ölgen bu çınarnıñ tamırları tıpqı özü kibi ana toprağından qoparılıp biñlerce kilometr uzaqqa fırlatılğan halqına can suvu taşığandır.

Cengiz Dağcı, aslında bütün insanlarğa inançnıñ küçüni köstermiştir. Bir insannıñ tamırlarından ne qadar uzaqta olsa olsun, vatanını ruhunda taşıp yaşata bilecegini ve bir kün oña qavuşa bilecegini köstergendir.

Ölgenden soñ olsa bile…

Elbet, Cengiz Dağcı böyle bir insandır. Cenk, esirlik, sürgünlik, mültecilik kibi birçok faciadan soñra hayatını sürdürmek durumında qalğanı İngilterede yazğan eserler ilk evelâ onıñ daha soñra da bütün Qırımtatarlarınıñ vatanlarına olğan inançını ve bağlılığını canlı tutqandır. Dağcı ayrıca herkeske Qırımnıñ ve Qırım halqınıñ yaşağan facianı añlatıp olğan yekâne yazıcı olğandır. Qırımtatarları onıñ ruhu ile yoğurğan ve sarsılmaz inançı ile yazğan eserleri sayesinde vatanğa qaytuv küreşinde inançlarını tazelegen ve quvet tapqandır. Qızıl imperializm her ne qadar saqıncalı olaraq yerleşmege tırışsa da, onıñ eserleri Qırımtatar Milliy Hareketine küç bergendir. Dağcı, Qırımtatarlarınıñ belki de eñ qaranlıq devrinde parıldağan bir küneş kibi halqınıñ küreşine küç bergendir. İşte bu sebepten Cengiz Dağcı, Qırım içün pek ehemiyetlidir.

Ancaq ne yazıq ki, ruhu yerine bedeni vatanına, Gurzufına qavuşabildi. Sağlığında qavuşamağan Qırımına ölgenden soñ bedeni ulaştı, vatan toprağı ile qucaqlaştı.

“Menim içün eñ mühimi, ömrümniñ soñuna qadar Qırımnıñ hasretinen kendimi haps etkenim filtişi kulemniñ içinde qalmaq olacaq edi.” (Hatıralarda)

“Cengiz Dağcı Oqumaları Yarışması” Qırımtatarlarınıñ edebiy sesi Cengiz Dağcını añmaq, eserlerini hatırlatmaq, sanat ğayesini genç quşaqlarğa qavratmaq ve içtimaiy degerlerge farqındalıq oluştırmaq amaçınen teşkil etilgendir. “Genç Tatar İnisiyativi” ve Qırım Dernegi Köklüce Şubesiniñ ortaq çalışması ile ötkerilgen yarışmağa “Ötüken” neşriyatı tarafından da destek berilgendir. "Cengiz Dağcı Oqumaları Yarışması"na yiberilgen eserler Jüri azaları tarafından degerlendirilme işlemi soñuna yetkendir.

Yarışmağa qatılğan her keske çoq teşekkür etemiz.

Cengiz dağcı Okumaları afiş

Yarışmanı qazanğanlar ve mükâfatlar şu şekilde belgilengendir:

1. Ömür Baha Dokuzvar - 5 000 TL, 1 Yıllıq “Emel“ dergisi online abuneligi

2. Özge KANDEMİR TEMİZEL - 3 000 Tl, 1 Yıllıq “Emel“ dergisi online abuneligi

3. Fatma ÖZMETLİ İNCE - Ötüken Neşriyat bağışlagan kitap seti, 1 Yıllıq “Emel“ dergisi online aboneligi

Mükâfatlar birazdan açıqlanacaq yer ve zamanda taqdim etilecektir. Mükâfat töreni ayrıca cemaatqa da ilân etilecektir.

 

 

 

Pin It
  • Gösterim: 147