Qırımda
"Ana Tilimde Laf Etem"
Yarışması Keçirildi

 

Qırımda hastalarğa, yañğız qartlarğa yardımda bulunğan hayırsever göñüllilerni birleştirgen "Açıq yürekler" teşkilâtı müim bir tedbir keçirdi. Ğayıp olmaq telükesi altında bulunğan tilimizni qorçalamaq oğrunda "Ana tilimde laf etem"   yarışmasını keçirmek ğayesinen çıqtı. Yarışqa qatılğan 70-den ziyade balaçıqlar tuvğan tilinde şiir oquğanı ve ya da yır icra etkenini videoğa çekip İNSTAGRAMğa yüklemesi kerek edi. İşte, keçenlerde bu yarışnıñ neticelerine yekün çekildi. Yarış teşkilâtçılarınıñ baş maqsadı — kencelerimizge tuvğan tiline sevgi aşlamaq olğanından yarışnıñ iç bir iştirakçisi mukâfatsız qalmadı. Bu da öz nevbetinde balalarğa ana tilini bilmesi içün bir siltem olabilir.

Yekün merasimini "Açıq yürekler" balaçıqlar içün neşeli bir bayramğa çevirdiler.

Yarışqa aktiv qoltutqan ve bivasta iştirak etken "Armançıq" bala dergisi öz ğaliplerini seçti, yarış iştirakçilerine bahşışlar berdi.

"Açıq yürekler"niñ göñüllileri ana tilini qorçalav ve inkişaf ettirüvge doğrultılğan bunıñ kibi tedbirlerni ileride daa sıqça keçirmek meramındalar.

 

 

 

Pin It
  • Gösterim: 98