Kiev'de "Qırım — Ukrainadır" Maarif Merkezi Açıldı
Kiev şeer şurası "Qırım — Ukrainadır" Kiev şeer informatsion-maarif merkezi" kommunal-bücet müessisesini qurdı. Merkezniñ işğal altındaki Qırımdan köçkenlerge hızmet köstermesi közde tutula. Bu qarar içün şeer şurasınıñ 85 deputatı(mebusı) rey berdi.
"Qırım — Ukrainadır" merkezini qurmaq teşebbüsinen "Golos" fraktsiyası çıqtı, - dep aytqan Ukraina halq vekili Rustem Ümerov; - Merkez Qırımdan köçip, Kievde yerleşken şahıslarğa konsultativ yardım ile qoltutacaq. Ümüt etem ki, merkezge yolbaşçı olaraq Ukrainanıñ tamır halqı olğan qırımtatarlarnıñ ve Qırımdaki ukrainlerniñ menfaatlarını eñ yüksek seviyede temsil etebilecek munasip bir insan tayinlenir, dep qayd etti. Merkezniñ devlet akimiyeti ve paytahtnıñ yerli idare organları ile işbirlik yapması közde tutula. Şeer şurasında qarar reyge qoyulğan vaqıtta salonda Qırımdan kelgen siyasiy mahbüs Vladimir Baluh da bulundı. Onıñ bildirgenine köre, işğal altındaki yarımadadan kelgen qırımtatarlar ve ukrainlerniñ meselesi ille Kievde çezilmeli. Baluh "Kiev — devletimizniñ paytahtıdır, Qırım ise devletimizniñ ayırılmaz bir qısmıdır. Kiev – qırımtatar ve ukrainlerniñ meselesi çezimine alıp kelgen yollarnıñ kesişidir. İşbu merkez kelecekte Qırımnı işğalden qurtaruv merkezi olmalı" - dedi.
Elvira Ablâziz / Kiev
