Halqara Santraç Turniriniñ Neticeleri
Şefika Gaspralı Qadın initsiativası tarafından teşkil etilgen “Qırım Medeniyet Künleri” nde Genç Tatar İnitsiativasınıñ 1-inci Qırımtatar Milliy Qurultayınıñ 104. Yıldönümine bağışlağan “Halqara Santraç Turniri” keçirildi.
Bu turnirge episi olıp 80 kişi müracaat etti. Arizalar sekiz farqlı ülkeden: Türkiye, Ukraina, Romaniya, Özbekistan, Türkmenistan, Almaniya, İngiltere ve Rusiyeden berildi.
Qayd yaptırğan 80 kişi arasında aveskâr sportçularnen beraber professional santraç oyuncıları da bulunmaqta edi. Professionallar arasında FIDE (Halqara Santraç Federatsiyası) derecesine sahip olğan sportçular da bulunmaqta edi ve olarnıñ arasında dörtü unvan sahibi santraç oyuncıları edi. Olardan Türkiye ve Türkmenistandan iştirak etken eki sportçu “International Master (IM) - Halqara Usta”, Rusiyeden iştirak etken bir sportçu “FIDE Master (FM) - FIDE Ustası”, Türkiyeden iştirak etken bir sportçu da “Candidate Master (CM) - Usta Namzeti” unvanına sahip sportçular edi.
Qayd yaptırğan 80 kişiden 68-i klassifikatsion matçlarında iştirak ettiler. İştirakçiler arasında bu usta oyuncılar da bulunmaqta edi.
Klassifikatsion matçlarınıñ iştirakçı sayısınıñ %20’si final matçlarında yarışacaq edi. Buña köre matçlarda iştirak etken 68 oyuncıdan %20-si, 5 ülkeden (Türkiye, Özbekistan, Türkmenistan, Romaniya ve Rusiyeden) 14 iştirakçı final oynadı.
Final matçlarınıñ neticesinde de ilk üç dereceniñ sıralaması şu şekilde oldı:
- IM Yusuf Atabayev / Türkmenistan – Haq qazanğan mukâfat: 3.000 TL
- Timur Alihocayev / Özbekistan – Haq qazanğan mukâfat: 2.000 TL
- IM Cem Kaan Gökerkan / Türkiye – Haq qazanğan mukâfat: 1.000 TL
Bu turnir başından soñunace facebook’tan canlı olaraq yayınlandı.
Final matçlarınıñ başlanmazdan evel Ufuk Aykolnıñ bu turnir adanğan 1917 Qurultaynı ve Qırım Ahali Cumhuriyeti haqqında bilgi bergen bir video qaydı ile Genç Tatar İnitsiativasınıñ Qırım Ahali Cumhuriyetiniñ 102.yıldönümi münasebeti ile hazırlaganu “Qırım Ahali Cumhuriyeti” vesiqalı filmi yayınlandı.
Klassifikatsion matçlarınıñ canlı qaydını şu linkten baqmaq mümkün:
https://www.facebook.com/genctatarr/videos/839964166955354
Final matçlarınıñ canlı qaydı ise şu linkten irişilir:
https://www.facebook.com/genctatarr/videos/5126516094073374
