"BİZ"
Camalanıñ  yañı albomı

 

Qırımtatar yırcısı Camala "Biz" adlı yañı albomına kirgen "İşanam saña" türküsini taqdim etti.  Bu yır aileniñ başı ve babalarğa bağışlana. Yırcınıñ aytqanına köre yır "yahşı insanlar olıp ösecek balalarğa işanç aqqında"dır.

"Ailede bala  terbiyesi hususında  tartışmalar iç tınmay. Yani ana evdeki bütün meselelernen oğraşmaq borclu, baba ise  istegeni kibi, dep sayıla cemiyette. Biz öz balalarına pek çoq vaqıt ayırğan, olarnen  kezingen, yuvundırğan, aşatqan, sportnen oğraşqan real babalarnı köstermege istedik, - dedi Camala.  Klipte yırcınıñ ömür arqadaşı Seit-Bekir Suleymanov, oğulları Emir-Rahman ve Selim-Giray iştirak ettiler. "İlk sefer menim ailem ve menim sıradan bir künüm  - ofiste körüşüvlerim, repetitsiya, aqayım ve oğlanlarımnen aqşam yemeginden ibaret künüm kösterildi", - ikâye etti Camala.  Türküniñ yaratıluvında  Camaladan ğayrı  Andrey Çmut (bestekâr) ve Darya Fedorenko (yır sözleriniñ müellifi) qatıldı.

200195458 215526847076871 4692478923243938076 n

Keçenlerde Camalanıñ  sekiz lirik yırdan tertip etilgen "Biz" adlı albomı dünya yüzüni kördi.  Yırcınıñ bildirgenine köre, bu albomnı  mühlisleri  ve sevgili ailesine bağışlağan.  "Biz — bu yañı menim! Biz — bu seniñ, menim, bizim aqqımızdadır! Biz berabermiz! Biz — bu menim ailem! Biz – bu menim muzıkal  bekgraundım.", dey qırımtatar yırcısı. "Menim içün bu pek müim ve emiyetli bir albomdır. Em de oña sadece menim ailem aqqında yırlar kirgeni içün degil de, epimizniñ duyğularımızdan ilham alğanı içündir.  Eger menden albomdaki yırlarnı bir cümlenen añlatmaqnı rica etseler, böyle der edim: "Sevgi, qudret, minnetdarlıq, işanç ve bağışlav. Biz daima kenardan kimlernidir diñleymiz, güya olar bizim nasıl yaşamaq kerekligimizni bizden yahşı bileler. Özümizni sevmemiz içün içimizde bir küç-qudret olmalı. Biz özümizge işanmaq, balalarımızğa işanmaq, olarnıñ aqiqiy insan olıp yetişecegine inanmaq borclumız. " -diye qayd etti yırcı.  

                                                                                                                                                                                                Elvira Ablâziz / Kiev

Camalanıñ yañı albomını bu adresten körebilesiniz: https://youtu.be/2uRk0zuXo8g

 

 

Pin It
  • Gösterim: 290