Biri birine, Qırımğa, Vatanğa Hasret Qalğanlar
“Emel Qırım Vaqfı”’nıñ “Fikir-Kültür Konferentsiyaları” çerçivesinde 2021s. Çiçek ayı 25 Bazar künü saat 17.00’de internet vastasınen teşkil etilgen toplaşuvnıñ başlığı “Biri birine, Qırımğa, Vatanğa Hasret Qalğanlar” edi.
Konferentsiyanıñ qonuşmacısı doktor ve yazıcı Serra Menekay edi.
Moderatorlığını Namıq Kemal Bayar yapqan tedbir QTMM Türkiye Temsilcisi ve “Emel Qırım Vaqfı” Reisi Zafer Qaratay’nıñ açılış qonuşmasınen başladı. Qaratay açılış qonuşmasında Türkiye’de Cuma küni qayd etilgen “Bala Bayramı”nı hayırlap, Serra Menekay’ğa hoş keldiñiz dedi.
Namıq Kemal Bayar, Serra Menekay haqqında iştirakçilerge malümat bergen soñ, taqdim başlandı.
“Emel Qırım Vaqfı”nıñ facebook saifesinde canlı olaraq da yayınlanğan konferentsiyada Menekay Qırımtatarlarnıñ 1770-nci seneden başlap 20-nci asırda da devam etken köçleriniñ sebeplerini añlattı. Bu köçler vaqtında halqnıñ yaşağanları haqqında söz yürsetkende, özü yazğan “Aluşta’dan Esken Yeller” romanında añlatqanı horantasınıñ taqdirinden de numüneler berdi.
Serra Menekay slaydlar vastasınen yapqan taqdiminde mevzunı künümizge qadar ketirdi. Şu arada horantasınıñ Qırım’da, Almaniya’da, sürgünlik vaqtında Özbekistan’da, Türkiye’de ve horanta 20 seneden ziyade vaqıt keçken soñ Qırım’da tapışqanda çıqartılğan fotoğraflarını da körsetti.
Menekay büyük meraq doğurğan programmasınıñ soñunda Qırım’da qalğan Fatma alasınıñ sesinden 1944s. Quralay 18-inde (18 Mayıs 1944) gecesi yaşanğanlarnı iştirakçilerge diñletti.
Tahminen 1.5 saat devam etken toplaşuv Serra Menekaynıñ iştirakçilerniñ suallerine cevap bermesinen yekünlendi.
Bu toplaşuvnıñ video qaydını "Emel Qırım Vaqfı" youtube saifesinde körebilesiñiz.
