“23 Nisan Ulusal Egemenlik ve Çocuk Bayramı”mız Hayırlı Olsun… ( E-43 )

“23 Nisan Ulusal Egemenlik ve Çocuk Bayramı”mız Hayırlı Olsun…

Dünyadaki balalarğa ediye etilgen ilk ve tek bayram oluv hususiyetini taşığan, uzun yıllardır halqara bir kimlik qazanğan bayramımıznı, afsus ki bir yıl daa meydanlarda ve büyük tantananen qayd etip olamaymız. Lâkin tehnologiyanıñ daa da çoq ayatımızğa kirgen şu künlerde, elbette, nimetlerinden faydalanmaq kerek. Bu tüşüncenen qırğınlıq sebebinden bıltır yapqanımız kibi evlerinden çıqamağan balalarımıznıñ er birinden öz imkânlarınen çıqarğan videolarını istedik. Böylece, balalarımız bu yıl da 23 Nisan quvançını internet vastasınen sizlerge de yetiştirdi.

Pek yahşı bilemiz ki, balalarımıznı qayğırmaq, olarğa güzel bir ayat azırlamaq, aslında kelecegimizni sağlam temeller üstünde qurmaq manasına kelmektedir.

Eger bugün dünyanıñ dört bir tarafındaki milyonlarnen insan til, din, ırqına baqmadan, insaniy degerlernen bir-birini quçaqlasa, mında yıllardır dünya balalarınıñ bağ tutuv merkezi olğan 23 Nisannıñ payını körmemezlikke urmaq mümkün degildir.

Qıymetli dostlarımız, bugünniñ bizler içün başqa müim tarafı da Türkiye Büyük Millet Meclisiniñ qurulğan 1920 senesi 23 Nisannıñ aynı vaqıtta Dernegimizniñ merhum Reisi Dr. Ahmed İhsan Qırımlınıñ doğğan künü olmasıdır. Onı rahmetnen añar ekenmiz ümüt etemiz ki, kelecek yıllarda özü de bala ekimi olğan ve balalarnı pek sevgen merhum Reisimizniñ adını taşığan Umumiy Merkezimiz “Dr. Ahmed İhsan Qırımlı Sosyal Tesisi”nde balalarımıznen beraber şeñ, eglenceli, quvançlı ve renkli bir müitte bu güzel bayramnı qayd etermiz.

Sağlam, bahtlı, tınç yarınlar isteklerimiznen bir kere daa kelecegimizniñ teminatı olğan balalarımıznı “23 Nisan Ulusal Egemenlik ve Çocuk Bayramı”nen tebriklep, sizlerni videolarımıznı seyir etmege davet etemiz.

Tuvğan Til