Özbekistanda yaşağan halqımız aqqında

                                                                                                                                                                                                             

zenife2.PNG 

Epimiz bilemiz ki, bütün dünyağa cayılğan halqımıznıñ bir qısmı Özbekistanda yaşay. Bazı bir tedkiqatlarğa köre Özbekistanda 100 binğe yaqın qırımtatar halqınıñ vekilleri yaşay. Milletimizge mensüp olğan insanlar eñ çoq Taşkent, Çırıçıq,Sırdarya, Gülistan, Almazar, Angren şeerlerinde yaşaylar.

1-Avdet_merkezınde_balalar_içün_resim_dersı.jpg

Köy yerlerinde yaşağan halqımız bahça işlerinen ve ayvanasravcılıqnen oğraşa. Şeerlerde yaşağan qırımtatarlar ülkeniñ qurucılıq saasına, sanayığa, maarif işlerine öz isselerini qoşalar. Halqımız içinde çeşit saalarda hızmet etip nam qazanğan, ürmetke lâyıq insanlar çoqtır.

1-Avdet_merkezinde_balalar_içün_teşkil_olğan_tedbirler.jpg

Ana Vatanından uzaqta qalğan, amma kimligini unutmağan milletimiz öz medeniyetini ve adetlerini saqlamağa tırışa. Halqımıznıñ bu hususiyeti toplaşuvlar ve cıyınlarda çoq belli ola.

1-Taşkent_şeirinde_Navrez_bayramı.jpg

Halqımız bayram tedbirlerini ve eyiliklerni qadim vaqıtlardan miras olıp qalğan ve evlâttan evlâtqa keçken milliy ürf-adetlerimizge köre temelcesine keçirmege ıntıla.

1-Yılbaş_gecesi.jpg

Evelden qırımtatar medeniyetiniñ inkişafına büyük hızmet körsetken, adları belli olğan bazı sanat ve medeniyet erbablarınıñ evladları bugün de bugün Özbekistanda yaşap kelmekteler. Bu insanlar halqımıznıñ birleştirilmesine, medeniyetimizniñ tiklenüvine, yaşlarımıznıñ terbiyesına devamlı hızmet eteler. Cemaatımız esasen “Avdet” Qırımtatar medeniyet merkezi tarafından teşkil etilgen tedbirlerde toplaşa ve biri birlerine yaqınlaşa.

2-Avdet_merkezınde_balalar_içün_resim_dersı.jpg

“Avdet” Qırımtatar medeniyet merkezi 1997 senesi Taşkent şeerinde teşkil olundı. Bu teşkilâtnıñ esas maqsadı – Özbekistanda qalğan halqımıznıñ öz medeniyetini, ana tilini, sanatını saqlamaq ve inkişaf ettirmektir. Bu künge qadar “Avdet” Qırımtatar medeniyet merkezi Özbekistanda yaşağan halqımıznı bir yerge toplağan yekâne cemaat teşkilâtıdır.

2-Avdet_merkezinde_balalar_içün_teşkil_olğan_tedbirler.jpg

Merkeziniñ ilkrehberi Jetere Jeyn Serverovna edi. 2000 senesinden 2005 senesine qadar Lemana Jemileva rehberlik yaptı. 2005 seneden bugünki künge qadar Nusret Jemilev rehberlik etip kelmektedir. Gençler vekili olaraq Eskender Serliyev sıqı yardım etip kelmekte.

2-Taşkent_şeirinde_Navrez_bayramı.jpg

Medeniy merkezde bayramlar, tematik aqşamlar, konsertler ve körüşüvler keçirile. Gençlerimizge ana tili dersleri teşkil etile.Bu derslerni Kadırova Dilara Edem qızı alıp bara.

Avdet_merkezınde_balalar_içün_dama_yarışı.jpg

Bayramlarnıñ muzıka ve türkü qısmını “Girey han” adlı vokal ve çalğı taqımınıñ bediy rehberi Zakir Acıosman alıp bara.

Avdet_qırımtatar_medeniyet_merkezinde_toplantı.jpg

“Avdet” medeniy merkeziniñ çerçivesinde teşkil olunğan “Qaranfil” oyun taqımı bayram tedbirlerinde iştirak ete. Bu taqımnıñ azaları arasında bulunğan Sinaver Devletşayev, Zenur Kerimov ve Merziye Useinovalarnıñ issesi büyüktir. 

4-Taşkent_şeirinde_Navrez_bayramı.jpg

“Avdet” merkeziniñ teşkiliy işlerini Alan Nasurlayev, Dilara Ametova, Lemara Bekirova, Lütfiye Şeyhislyamova, Lilya Yazıcıyeva, Benyamin Muratov, Nuri Bekirov alıp baralar.

ozbekistan2

 

Er yıl diniy Ramazan ve Qurban bayramlarına “Avdet” milliy merkezniñ işlerine yardım qolu uzatqan gençlerimiz ortada para toplap muhtac olğan qorantalarğa maddiy yardım körseteler, qartlarımızğa evlerine barıp bayram hayırlaylar. Ondan ğayrı saipsiz qalğan mezarlarımıznı tertipke ketireler.

Cemaatımız er sene 18 Mayıs künü Taşkent şeerinde “Şehitler hatırası” meydanında toplanıp dualar oquy ve “Siyasiy basqı qurbanlarınıñ hatırası” Devlet muzeyinde Qırımtatar halqınıñ matem kününe bağışlanğan tedbirlerni keçireler.

Umumen, Özbekistanda yaşağan halqımız biri birine ep yaqın olamağa, qol tutmağa tırışalar. Ana Vatandan uzaqta qalğan halqımız içün muabet olmaq, adetlerimizni saqlamaq çoq muimdir.


 

Pin It
  • Gösterim: 473